(297) 5224200

 

Si no tin sangura Aedes aegypti, no tin transmision. Proteha bo mes contra pica di sangura uzando repelente contra sangura (cu ta contene DEET), mecha pa core sangura, muskita mat, drumi bou di musketero.
Preveni  door di elimina e sangura Aedes aegypti y tur luga caminda e por broei (criadero), den cura, paden y rond di cas, den becindario y ora bay cu vakantie.

LUGA CU E SANGURA AEDES AEGYPTI POR BROEI (CRIADERO)
DEN CURA:

  • Bari of hemchi cu awa. Tapa bari of hemchi cu awa cu sefta of paña.
  • Taira (tire). Si bo no ta uz’e mas, bent’e na dump public of bora taira cu ta wordo uza como schommel.
  • Bari di sushi. E bom di e bari mester ta bora, pa awa no para aden.
  • Baki cu awa pa bestia di cas, manera cacho, parha, pushi, etc. Cambia nan awa di bebe tur dia y laba e baki bon pa destrui e webonan di sangura.
  • Pos di wc (septic tank): Basha kerosin den pos 1 biaha pa luna. Percura pa e tin un tapa di scruf (pvc). E tubo di escape mester ta tapa cu sefta. No laga pomp septic den e pos.
  • Goot di dak. Mantene goot limpi y e goot mester tin un bahada, pa awa no keda para.
  • Otro recipiente cu ta wanta awa manera scoter of baki bou di potchi mata (yen’e cu santo of no uz’e mes)
  • Bleki y boter boca hari: deshaci di nan si nan no ta den uzo.
  • Fontein den cura: pone pisca aden.
  • Artefacto y obheto cu no ta den uzo: warda of tapa nan. Tapa wasmashin, stoof, frigidaire y coi hunga den cura cu no ta den uzo mas.
  • Buraco coba na unda awa por keda para. Yena e buraconan cu tera.
  • Hol of buraco den mata. Yena buraco den mata cu santo of cement.
  • PADEN Y ROND DI CAS:
  • Vaas (florero) cu mata of flor den awa. Cambia awa di e vaas cada 2 of 3 dia. Haci e vaas bon limpi, specialmente na e rand caminda e awa a para. Ta importante pa laba stengel y rais di e flor of mata cu tabata den e vaas.
  • Baki di awa bou di frigidaire. Haci e baki limpi 2 biaha pa siman.
  • Baki di awa bou di airco. Pone tubo pa laga e awa di condensacion bay pa mata.
  • Drainer di awa cu no ta regularmente den uzo. Pone un cuchara di salo den dje of tap’e cu su dopi (plug).
  • Baki bou di e reki di coi kibra. Basha e awa afo tur dia.

 


Controla pa cualkier obheto of recipient den cua awa por keda para. Si ta posibel, tira esaki afo.
ORA BAY CU VAKANTIE:

  • Tapa drainer di awa cu masking tape.
  • Tapa pot di wc of pone 1 cuchara di salo den pot di wc.
  • Warda of deshaci di tur loke cu por ta un posibel criadero.
  • Tira tur sushi den bari. Sushi grandi mester hiba na un dump public. Deshaci di tur obheto den cas, patio y cura den cual awa por para.