(297) 5224200

Relato di Prensa Departamento di Salud Publico 

2015

DIA MUNDIAL CONTRA ABUSO DI HENDE GRANDI,

15 DI JUNI

Nos poblacion conoce un grupo grandi di hende grandi di 60 aña pariba y e grupo aki ta sigui crece. En conexion cu Dia Mundial contra Abuso di Hende Grandi -15 di juni-, seccion Cuido di Hende Grandi na Departamento di Salud Publico (DESPA) a organisa un atardi di informacion riba e tema aki. Dos studiante di Universidad di Aruba di seccion Social Work and Development, esta Lisbel Abreu y Tania Kirchner, a duna un presentacion cu ta titula ‘Abuso di hende grandi’. Varios instancia  y organisacion cu diariamente tin di haber cu cuido di hende grandi a forma parti di e publico invita pa participa na e charla aki. Esunnan cu tabata presente ta trahando na e casnan di hende grandi, Wit Gele Kruis, Departamento di Asuntonan Social, SABA, un geriater pero tambe e trahadonan di DESPA, a informa nan mes debidamente di locual e studiantenan a trece dilanti. E temanan relaciona cu abuso di hende grandi, cu a keda presenta ta entre otro: “Kico ta abuso di hende grandi”, “Con ta reconoce e 7 tiponan di abuso”, Ken tur por comete abuso cu hende grandi”, “Con pa preveni abuso”. Den transcurso di e lunanan nos dilanti lo trata mas di e topico aki, pero tambe otro topico relaciona cu hende grandi lo keda presenta pa publico en general. Semper ta bon pa bo ta informa debidamente ora ta trata di cuido di nos hendenan grandi.

 

Si abo conoce un of mas caso di abuso di hende grandi no keda keto, pero notifica e autoridadnan competente. Den e caso aki sea Departamento di Salud Publico, Departamento di Asuntonan Social of polis.