(297) 5224200

Relato di Prensa Departamento di Salud Publico 

2015

Caya ing. R. Lacle 4                                                                                                                                                

Tel.nr: 5224200

Faxnr: 5826436

 

Dia Mundial di Hepatitis:

28 di juli

 

Hepatitis ta un malesa cu ta afecta e higra. Mayoria biaha esaki ta wordo causa pa e virus di Hepatitis pero tambe por wordo ocasiona door di abuso di alcohol y cierto droga. Tin 5 tipo di Hepatitis: Hepatitis A,B,C,D y E. Rond mundo mas cu 240 miyon hende ta biba cu Hepatitis B y 780 mil ta muri a consecuencia di Hepatitis B pa aña. Data colecta di Departamento di Salud Publico ta mustra cu entre 2006 pa 2014 a wordo registra 421 caso di Hepatitis di cual 342 di e casonan ta Hepatitis B (81.4%). Mita di e casonan ta personanan entre 25-44 aña di edad y mescos cu rond mundo, aki na Aruba tambe e sexo mas afecta ta e hende homber. Hepatitis A y E ta wordo transmiti door di come cuminda of bebe awa contamina. Hepatitis B, C y D ta wordo transmiti door di comparti material higienico personal, uzo di material cu no ta steriel ora di haci tattoo of cualkier forma di piercing, comparti uzo di material pa consumo di droga y contacto cu likido di curpa di e persona infecta (contacto sexual of di mama pa yiu). E sintomanan mas comun di Hepatitis (B) ta dolor den bariga, cansancio, cabes ta bira y sacamento, orina color scur, cuero y wowo di color geel. E sintomanan aki hopi biaha ta bira visibel ora e malesa a daña e higra seriamente. Hepatitis (B) por conduci na daño permanente di e higra, cancer di higra y te yega na e necesidad pa un transplante di higra. Pa preveni Hepatitis A y B tin vacuna. Vacuna pa preveni Hepatitis B ta wordo duna na tur mucha na Aruba cu autorisacion di mayor pa medio di e campaña di vacunacion. Tambe e personanan cu den nan trabou diario ta core riesgo di keda infecta ta haya e vacuna aki na Aruba. Nan ta personal cu ta traha den sector di salud, polis, personal di brandweer y cuidado di preso. Pa Hepatitis C,D y E no tin vacuna. P’esey prevencion ta keda importante. Haci bo chekeo di sanger pa detecta si bo ta infecta cu Hepatitis pa asina tuma bo medidanan necesario. Pa mas informacion por tuma contacto cu seccion Malesanan Contagioso di Departamento di Salud Publico na tel: 522-4200.