(297) 5224200

 

Minister dr. Alex Schwengle:

Na Aruba nos tin hopi experticio den cuido pa hende grandi

 

ORANJESTAD, Aruba – 13 di september 2015: Na Aruba tin hopi experticio den e area di cuido di hende grandi, pero falta coordinacion pa tin miho bista riba loke ta wordo ofreci, loke tin y con pa amplia e cuido na un forma integral. Minister dr. Alex Schwengle, kende for di su ministerio tambe a traha riba un documento pa cu “ouderenzorg” cu ta keda cla na luna di october, a participa na e prome reunion di e plataforma pa Cuido di nos Grandinan.

 

E plataforma ta wordo encabesa pa e specialista den medicina geriatrico, dr. Sandro Waterloo y coordina pa Directie Volksgezondheid. Minister Schwengle a splica cu e intencion ta pa yega na cuido integral pa nos grandinan. No ta cuestion cu na aruba falta recurso, den sentido di experticio ,pero falta pa e experticio ta coordina pa asina yega na cuido integral, segun e mandatario.

 

 

E plataforma Cuido di Nos Grandinan ta consisti di Departamento di Salud Publico, S.A.B.A. , Wit Gele Kruis, Dr. Horacio Oduber Hospitaal , Departamento di  Asuntonan Social  y un representante di casnan di cuido priva.

 

E mandatario a bisa cu un area cu particularmente lo kier pone un enfoke mas grandi ta e cuido na cas y  den e bario, pasobra esaki ta loke e grandinan ta prefera y tambe e ta menos caro. E cuido no profesional, o sea na cas, ta combina basicamente dos factor importante, esta e deseo di e persona pa keda biba unda e kier biba y ta yuda contene e gastonan di cuido.

 

El a agrega cu e servicio pa e verpleegpatient cu ta biba den un cas di hende grandi tambe mester wordo mehora. Ta diferente faceta di e cuido mester wordo mehora y cooperando cu otro e instancianan, cooperando cu otro cu e informacion corecto di kico cada uno ta haciendo, nan experiencia, experticio y nan areanan di trabao, lo por maneha e cuido central pa asina cada peticion pa cuido haya e informacion y cuido necesario na e miho prijs, Minister Schwengle a expresa.

 

Mester combina miho calidad cu e miho uzo di e florin, y esaki no ta tumando luga na un forma optimal actualmente, el a añadi. E titular di salud publico a bisa cu ta premira cu e plataforma lo bira mas grandi den futuro.

 

Finalisando el a gradici dr. Waterloo, Directie Volksgezondheid y tur miembro di e plataforma, como tambe e “Ouderenafdeling” cu a wordo estableci recientemente na Directie Volksgezondheid y ta haciendo un tremendo trabao.