(297) 5224200

E mesun sangura Aedes Aegypti ta transmiti e virus
E unico forma pa preveni Zika ta dor di elimina criadero

Desde 6 aña pasa caba Departamento di Salubridad Publico di Aruba ta trahando hunto cu Rijksinstituut voor Volksgezondheid en Milieu riba e "International Health Regulations"

relaciona cu acuerdonan di salud entre tur pais rond mundo. Aki mester pensa riba standardnan di siguridad y calidad den salubridad publico.

Un di e aspectonan den e "IHR" ta enfermedadnan contagioso y e procedura di "melding" y contingencia, cu ta evita cu e enfermedad ta plama. E departamentonan di Epidemiologia y di Maneho ta encarga cu implementacion di e procesonan di IHR.

Bou di enfermedadnan contagioso tin tambe e "vectorborn diseases" manera nos conoce Dengue, Chicunguña y Zika. Tur ta wordo transmiti dor di e mesun sangura "Aedes Aegypti".

Bisando esaki, desde 6 aña pasa caba a cuminsa prepara, traha plannan, draaiboek, traha protocolnan y otro medidanan mas si un dia Zika mester yega Aruba. E protocol cu IHR ta bastante standard y ta aplicabel den varios caso, asina DESPA a aplik'e ora tabatin e menasa di e enfermedad Ebola.

Awor cu e confirmacion di Laboratorio, relaciona cu casonan di Zika na Aruba, mesora e ekipo di DESPA a activa y ta siguiendo tur e protocolnan manera acorda. A informa Rijksinstituut voor Volksgezondheid en Milieu di e casonan confirma, kende na su turno ta informa World Health Organisation.

Cu awor tin confirmacion no tin nada di haber cu e maneho cu DESPA ta hibando caba pa casonan sospechoso. Asina cu un dokter di cas informa di un caso sospechoso, aunke e pruebanan ta bay te Laboratorio na Hulanda pa confirma, toch aki na Aruba e departamentonan ta activa, ta controla cas di e pashent, spuit pa sangura y dokternan ta trata e pashentnan comosifuera e ta un caso confirma.

Departamento di Salubridad Publico a manda 16 caso sospechoso caba pa laboratorio na Hulanda. Mayoria tabata negativo pero e siman aki a drenta confirmacion cu 4 caso tabata positivo.

Departamento di Salubridad Publico ta confirma cu tur 4 caso ta importa. Mester menciona cu tur 4 pashent ta biba na Aruba, 2 pashent a bin cune for di Colombia, 1 for di Brasil y 1 for di Venezuela. Ningun di nan ta hende muhe na estado. Entretanto tur 4 pashent ta cura caba.

Manera informa, asina cu a drenta melding di sospecho di posibel Zika, cu e departamento GKMB a bay spuit tur rond di nan casnan y vecindario pa evita cu tin sangura cu por transmiti e enfermedad.

Mientrastanto e siman aki Departamento di Salubridad Publico a manda 22 caso sospechoso mas pa laboratorio na Hulanda. Atrobe, tur e casonan sospechoso aki a wordo trata comosifuera nan ta confirma, pa garantisa cu ta tuma e medidanan preventivo.

Cu e realidad aki awor, ta mas urgente pa comunidad coopera dor di elimina criaderonan tur rond di nos isla. DESPA a hiba e preocupacion aki te na nivelnan di mas halto den Gobierno, pa cual a reuni cu varios instancia manera DOW, Serlimar, City Inspector, Polis di Bario y otronan, pa sigura cu tur hende tin e mesun meta pa elimina criadero pa evita sangura cu ta transmiti e enfermedad.

"No tin motibo pa panico", asina Drs. Jerry Staring, director di DESPA a confirma. Zika no ta un enfermedad mortal, manera Dengue si por ta. Entre Dengue, chikungunya y Zika, mester corda cu Zika ta esun di mas leve. Pero e por tin su consecuencianan y si no tene medidanan di prevencion, e por plama y bira un problema mas grandi pa salud publico.

"Mi peticion awe ta pa comunidad completo, di mucha te adulto, di Noord te San Nicolas, tur hende mester coopera y check rond di cas pa preveni criadero. Si no tin e sangura Aedes Aegypti, no tin transmision y no tin Zika", asina Staring a termina bisando.

 
Departamento di Salud Publico Aruba -Despa's photo.