(297) 5224200

E unico forma pa preveni Zika ta dor di elimina criadero di sangura. A confirma cu 4 pashent a contagia cu Zika na Aruba mes

Awe a confirma cu 4 persona na Aruba a keda infecta cu e virus di Zika.

Aki ta trata di 3 persona cu ta biba na Aruba y un

persona procedente di Hulanda cu tabata di vakantie. Ya caba a haya e virus di Zika den region di Caribe, di cual recientemente tambe na Boneiro y Corsou. No ta nada straño cu e virus lo plama pa e otro islanan di reino Hulandes. Pa e biaheronan pa Aruba tambe e conseho a bay pa tuma e medidanan contra sangura tanto den dia como den oranan di atardi pa anochi. Den prensa na Hulanda a sali e conseho pa hende muhe na estado y hende muhe cu kier sali na estado pa consulta cu un dokter tocante nan biahe y si e biahe no ta necesario, pa considera cancela esaki.

Pashentnan na Hulanda
Na Hulanda tin te cu aworaki 24 persona constata cu Zika. Nan tur a keda infecta durante biahamento. Pasobra cu e sangura responsabel pa Zika no ta presente na Hulanda, e posibilidad cu e virus lo plama na Hulanda ta nulo. Na nos isla si tin presencia di e sangura Aedes aegypti cu ta carga virus di Zika y tin riesgo pa Zika plama.

Pashentnan na Aruba
Na Aruba tin un total di 11 persona cu a keda infecta cu e virus di Zika, di cual 7 persona a biaha pa paisnan den region y a infecta cu e virus. Un total di 4 persona a keda infecta locamente, esta na Aruba mes. Esaki kiermen cu e virus ta circulando bou di e sanguranan riba nos isla, cu ta haci e chens mas grandi pa e virus plama riba Aruba. Mirando con rapido e virus ta plama den e paisnan den region, por a premira e situacion aki na Aruba tambe.

Keintura causa pa Zika
E virus di Zika por causa keintura. Ta bon pa aclaria cu 1 di cada 5 persona infecta cu e virus di Zika lo haya sintoma. Mayoria biaha e enfermedad ta pasa hopi suave. E kehonan primordial ta keintura, wowitis (sin pus), dolor di cabes y rash na curpa. Tin indicacion cu un infeccion cu e virus di Zika durante e prome temporada di embaraso por causa un mal formacion di celebro di e baby (microcephalia). Na e momentonan aki investigacion ta andando di un posibel relacion entre infeccion di e virus y mal formacion celebral.


Precaucion preventivo
NO tin vacuna pa Zika. Importante pa tuma medida contra pica di sangura durante dia y durante oranan di atardi pa anochi. Esaki ta baha e riesgo pa wordo pica door di un sangura. Na hende muhe na estado ta wordo recomenda pa tuma medida contra pica di sangura cu mas precaucion.
• Bisti paña cu ta tapa essayovernight curpa.
• Hunta parti di curpa cu no ta cubri cu paña, cu repelente contra sangura cu ta contene DEET (diethyltoluamide). Como precaucion ta conseha pa no aplica DEET den concentracion mas halto cu 30% riba mucha menor di 2 aña of hende muhe cu ta na estado.
• Drumi semper bou di un muskitero of den un luga caminda cu no tin sangura.

Siguridad di turista ta wordo considera un prioridad na Aruba. Departamento di Salud Publico Aruba (DESPA) ta trahando hunto cu Aruba Tourism Authority (ATA). E sector turistico ta tumando medida den hotelnan y apartamentonan pa elimina e sangura adulto y asina minimalisa pica di sangura. Banda di esaki ta percura pa tin repelente contra sangura disponibel pa turista. Frecuentemente ATA ta tene e sector turistico na haltura di tur desaroyo mas recien cu ta pasa tocante di e situacion actual.

Conseho ora di biaha
DESPA ta conseha hende muhe na estado y hende muhe cu kier sali na estado pa tuma contacto cu nan dokter di cas, ginecologo of partera tocante nan biahe pa paisnan cu tin Zika y pa considera cancela nan biahe si esaki no ta necesario. Esaki no ta mescos cu un conseho negativo pa cu biahamento! A base di e informacion actual ningun conseho negativo pa cu biahamento a keda duna pa WHO. Departamento di Salubridad Publico Aruba ta sigui e consehonan aki. Pa mas informacion por tuma contacto cu DESPA na telefon 5224200.